МЕХАНИК РЕЗОНАНС

Нега аскарларга кўприкда бир хил қадам ташлаш таъқиқланади?

1850 йилда Франциянинг Анже шаҳридаги осма кўприкдан 478 нафар аскар саф тортиб, марш билан (яъни ҳамма бир хил ритмда, бир хил қадам ташлаб) ўтишни бошлайди. Аскарларнинг қадам ташлаш ритми кўприкнинг ўзига хос тебраниш частотасига мос келиб қолади. Натижада физикадаги  ҳодиса — РЕЗОНАНС юз беради.

Кўприкнинг тебраниши геометрик прогрессияда кучайиб кетади ва қалин пўлат арқонлар чилпарчин узилиб, бутун бошли кўприк қулаб тушади!

Шундан бери бутун дунё армияларида битта қатъий ва қоида бор "Кўприк устидан ўтаётганда саф бузилсин! Ҳар ким ўз ҳолича, тартибсиз, ҳар хил қадам ташлаб ўтсин!"

Нега? Чунки ҳамма бир хил ҳаракат қилса, тизим ўта мўртлашади ва синади. ТУРЛИ ХИЛ ҳаракат эса кўприкни ҳалокатдан сақлаб қоладиган —Амортизатордир!

Муллакратия ва "Инкубатор Жамияти"

Муллакратиянинг энг катта орзуси нима? Улар жамиятни Бир хил қадам ташлайдиган аскарлар сафига айлантирмоқчи

  Ҳамма бир хил рангда, бир хил бичимда кийиниши керак.

 Ҳамма  бир хил мусиқа эшитиши (ёки умуман эшитмаслиги) керак.

 Савол бериш мумкин эмас — фақат "Амир" ёки "Шайх" айтган гапни бир овоздан тасдиқлаш керак.

Улар буни "Умматнинг бирдамлиги ва кучи" деб кўрсатишади. Лекин тарих ва мантиқ шуни кўрсатадики, бунақа Идеологик Резонанс жамиятни ўта заиф ва мўрт қилиб қўяди!

Қаерда ҳамма бир хил фикрласа, ўша ерда тараққиёт тўхтайди. Ташқаридан кичик бир "шамол" эсса (замонавий технология кириб келса, янгича иқтисодий инқироз бўлса ёки бошқа маданият билан тўқнашилса), бутун бошли "бир хил" жамият резонансга учраб, саросимага тушади ва ичидан синиб, радикаллашиб кетади. Чунки уларда зарбани юмшатадиган Хилма-хиллик амортизатори йўқ!

Қуръоннинг "Амортизация" Қонуни (Хилма-хиллик) — Раҳматдир!

Муллакратия ҳаммани инкубатор жўжасидек бир хил қилмоқчи бўлиб турганда, Яратувчи бутун коинотга хилма-хиллик қонунини жорий қилганини эълон қилади. Бу оятлар муллалар "бир хиллик" утопиясига берилган энг кучли раддиядир...

" Унинг оят-ишоратларидан бири, Осмонлару-Ернинг яратилиши, ҳамда тилларингиз ва рангларингиздаги фарқлилик. Албатта, билувчилар учун бунда оят-ишоратлар бор." (Рум сураси, 22-оят).

Яратувчи "Мен сизларни хилма-хил қилиб яратдим ва бу менинг мўъжизамдир!" деяпти. Муллакратия эса бу мўъжизани йўқ қилиб, ҳаммани битта рангга бўямоқчи бўлади.

" Эй одамлар, Биз сизни эркак ва аёлдан яратдик, сизлар бир-бирингизни таний олишингиз учун турли халқлар ва элатлар қилдик. Аллоҳ наздида кўпроқ ҳурматга сазовор - тақводорроқ бўлганингиздир. Аллоҳ Алим Хобир / билгувчи, хабардор."(Ҳужурот сураси, 13-оят).

Яъни, жамиятнинг кучи унинг бир хиллигида эмас, балки турли фикрлар, турли маданиятлар ва турли ёндашувларнинг бир-бирини тўлдиришидадир. Ислом тарихининг олтин даврига (Уйғониш даврига) қаранг у ерда математик ҳам, файласуф ҳам, мусиқачи ҳам, мулла ҳам бемалол бир дастурхон атрофида баҳслаша олган. Жамиятда "тартибсиз, лекин эркин қадам" бўлгани учун у ҳеч қандай инқироз олдида синиб кетмаган.

Агар кимдир сизни жамиятдан ажратиб, ўзларининг "бир хил кийинган, бир хил гапирадиган ва бир хил нафратланадиган" сафига қўшмоқчи бўлса — уларга кулиб қўйинг ва мана шу физика қонунини эслатинг.

Бизга кўприкни қулатадиган "қўйларнинг бир хил марши" эмас, балки кўприкни бақувват ушлаб турадиган онгли, хилма-хил ва мустақил фикрловчи шахслар керак! Бизнинг йўлимиз — муллакратия казармаси эмас, балки Коинотнинг ранг-баранг лабораториясидир!

02.06.2026
https://t.me/iqro114
Sho.95