РУПЕРТ ТОМЧИСИ

Нега Муллакратия қўрқинчли тизими бир сонияда чилпарчин бўлади?

Физик ва механик факт...Агар эритилган қайноқ шишани (шиша массасини) совуқ сувга томизсангиз, у қотиб, худди кўзёшига ўхшаган узун думли шиша томчига айланади. Физикада бу "Шаҳзода Руперт томчиси" дейилади. Бу томчининг даҳшатли парадокси бор..

« Енгилмас Бош қисми »

Томчининг йўғон боши шунчалик қаттиқки, унга тўппончадан ўқ узсангиз, ўқ пачоқланиб кетади, болға билан бор кучингиз билан урсангиз, болғанинг ўзи синади. Шишага ҳеч нарса қилмайди! Чунки унинг ичида даҳшатли "Ички босим"  йиғилган бўлади.

 «Заиф Дум қисми»

Лекин бу мутлақо енгилмас бўлиб туюлган томчининг ингичка, нозиккина думи бор. Агар ўша думининг учини салгина чертиб юборсангиз ёки омбир билан озгина синдирсангиз... бутун бошли ўқ ўтмас шиша бир миллисония ичида портлаб, майда чанг-тўзонга (кукунга) айланиб кетади!

Чунки бутун тизим фақат сунъий ички зўриқиш ва босим ҳисобига ушлаб турилган эди. Босимнинг кичик бир нуқтадан чиқиб кетиши бутун структурани портлатади.

« Муллакратия "Шиша Тизими"»

Мутаассиблар жамиятда худди "Руперт томчиси" каби жуда қўрқинчли, қаттиқ ва бузилмас структура қуриб олишади.

 Уларнинг "Боши" (Ваҳимаси) Улар минглаб сохта ҳадислар, қўрқитишлар, фатволар ва агрессив оломондан иборат "зирҳ" кийиб олишади. Сиз уларнинг асосий догмаларига (масалан, кийим шаклига ёки ақидавий баҳсларига) тўғридан-тўғри қарши чиқиб, баҳслашмоқчи бўлсангиз (яъни болға билан урмоқчи бўлсангиз), уларни енга олмайсиз. Улар сизни оломоннинг шовқини ва минглаб хақоратлар билан "пачоқлаб" ташлайди. Ташқаридан уларнинг позицияси ўқ ўтмас бўлиб кўринади.

 Нега бундай? Чунки уларнинг бутун жамоаси "Ички босим" — қўрқув, тафаккурни бўғиш ва кўр-кўрона итоат қилиш ҳисобига ушлаб турилади. Эркинлик йўқ, фақат зўриқиш бор.

"Думни сидириш" тактикаси ёки Ботилнинг портлаши»

Лекин ҳар қандай ёлғон ва зўравонликка қурилган тизимнинг "ингичка думи" бўлади. Бу — Кичик Мантиқий Зиддиятдир!

Сиз улар билан катта мавзуларда талашиб ўтирмайсиз. Сиз шунчаки уларнинг тизимидаги энг нозик, лекин мантиққа тўғри келмайдиган битта кичкина саволни (думни) топасиз ва ўшани синдирасиз.

Масалан "Агар Аллоҳ чексиз адолатли бўлса, нега сизнинг фақат битта кичкина гуруҳингиз нажот топади-ю, қолган миллиардлаб яхши одамлар жаҳаннамга тушиши керак?"

Шу битта мантиқий савол (думнинг синиши) уларнинг миясидаги бутун бошли қўрқув ва ёлғондан иборат "ўқ ўтмас" структурани ичидан портлатиб юборади. Улар жавоб топа олмай асабийлашади, тизим кукунга айланади.

Ўргимчак уяси ва Ботил

Қуръон муллалар ва мушриклар яратган ҳар қандай баҳайбат, қўрқинчли тузилмаларнинг аслида тузоқ эканини тушунтиради

" Аллоҳдан ўзга валийларни/йўл кўрсатувчиларни тутганларнинг мисоли худди урғочи Ўргимчак инини тутганга ўхшайди. Инлар орасида энг заиф ин бу урғочи ўргимчак ини, қанийди билсалар." (Анкабут сураси, 41-оят).

Ўргимчак тўри  ҳашаротлар учун чиқиб бўлмас даҳшатли қопқон. 

Яна бир оятда эса, "Руперт томчисининг" портлаши тўғридан-тўғри баён қилинади

"Ва яна айт: “Ҳақ келди, ботил чекинди; Ҳақиқат шуки, ботил чекинишга маҳкум" (Исро сураси, 81-оят).

Яъни, ёлғоннинг табиати (физикаси) шунақа — у ички зўриқишга қурилгани учун, кичкинагина Ҳақиқат тегиши билан ўзидан-ўзи чангга айланиб кетишга маҳкум!

Агар атрофингизда муллакратия вакиллари баланд овозда, минглаб одамларни йиғиб, ўқ ўтмас бўлиб ваҳима қилаётган бўлса, ҳеч қачон чўчиманг. Улар билан тўғридан-тўғри тўқнашиб, "болға" ишлатишга ҳожат йўқ. Асосийси — уларнинг тизимини тутиб турган мантиқсизлик "думини" топиш ва совуққонлик билан шунчаки чертиб қўйиш. Қолганини физиканинг ўзи ҳал қилади — уларнинг ёлғонлари ўз босимидан ўзи портлайди!

25.05.2026
https://t.me/iqro114
Sho.95