Табиатда шундай нарсалар борки, уларни ҳеч ким хусусийлаштира олмайди: Қуёш нури, ёмғир, ҳаво. Сиз ҳаводан нафас олиш учун кимгадир солиқ тўламайсиз. Аллоҳнинг динидаги "Яхшилик" (Солиҳ амал, Эҳсон, Адолат) ҳам худди шундай Қуёш нуридек умуминсоний ва мутлақ эркин нарсадир. Лекин Муллакратия эса.. Улар Қуёшнинг устига ўзларининг "Логотипини" ёпиштириб олишди!
Уларнинг мантиғи бўйича.... "Агар сен етимнинг бошини силасанг, касалхона қурсанг ёки инсоният учун дори ихтиро қилсанг-у, лекин БИЗНИНГ гуруҳда бўлмасанг, БИЗНИНГ мазҳабни ушламаган бўлсанг ва БИЗНИНГ кийимни киймаган бўлсанг — сенинг яхшилигинг ноль! Қабул қилинмайди! Сен дўзахга тушасан!"
Бу нима дегани? Бу — муллалар Аллоҳнинг кенг раҳматини ўзининг кичкина, қоронғу "офисига" қамаб қўйиб, эзгуликка Монополия ўрнатганидир. Улар Аллоҳни ўзларининг "шахсий мулки" деб эълон қилишган.
Маънавий Инфляция "Қалбаки Пул" бозори
Иқтисодиётда "Инфляция" деган бало бор. Давлат ўзида олтин захираси бўлмаса ҳам, қоғоз пулни босиб чиқараверса, пулнинг қадри тушиб кетади ва бир қоп пулга битта нон берадиган бўлиб қолишади.
Муллакратия дин ичида худди шундай Маънавий Инфляцияни келтириб чиқарди!
Олтин стандарт (Асл дин) Қуръондаги диннинг "олтин валютаси" бу — жамиятга реал фойда келтириш, илм-фан, ҳалоллик, адолат ва тафаккурдир.
Қоғоз пул (уйдирма дин) Муллакратия эса бу олтин стандартни йўқ қилди ва ўрнига арзон "қоғоз пулларни" (шаклбозлик, юзлаб сунъий тақиқлар, кўр-кўрона такрорланадиган ритуаллар) тонналаб босиб чиқарди.
Натижада нима бўлди? Одамларнинг чўнтаги (амаллари) "қоғоз пулга" тўла — тасбеҳлар ўгирилган, соқоллар ўлчанган, кийимлар қисқартирилган. Лекин бозорга (реал ҳаётга) чиқиб бу пулга "Адолат", "Илм" ёки "Тинчлик" сотиб олай деса, ҳеч ким бермайди! Чунки уларнинг шаклбозлик пули ҳаётда ўтмайди, қадрсиздир!
"Маънавий Божхоначилар" ва Виза режими
Муллалар ўзини Жаннатнинг дарвозасидаги "Божхоначилар" (Таможня) деб ҳисоблайди.
Тасаввур қилинг..Бир инсон (масалан, инсониятни қутқарган бирор олим ёки оддий ҳалол инсон) Жаннат дарвозасига бир чемодан тўла "Яхшилик" ва "Меҳнат" билан келди.
Шунда Муллакратия божхоначилари югуриб чиқиб, чемоданни очишади-да, дейишади
"Хмм, яхшиликларинг кўп экан. Лекин тўхта! Сенинг паспортингда 'Бизнинг Тоифадан' деган виза йўқ-ку! Сенинг фиқҳий қарашларинг фалончи имомникига мос тушмабди. Бўлди, бу чемодандаги яхшиликларинг контрабанда ҳисобланади! Ҳаммаси мусодара қилинади ва ўзинг жаҳаннамга кетасан!"
Улар Аллоҳни гўёки одамнинг қалбига ва қилган меҳнатига эмас, балки пешонасидаги "Тамғасига" (брендига) қараб баҳо берадиган майда божхоначига айлантириб қўйишган.
Агар қайсидир мутаассиб олдингизга келиб, бошқа инсонларни ёки олимларни "Улар бизнинг йўлда эмас, шунинг учун қилган ҳар қандай яхшилиги куяди, улар кофир" деб, ўзининг гуруҳини ягона қутқарувчи деб мақтаса...Унга шундай денг:
"Сиз Аллоҳнинг кенг раҳматини ўзингизнинг кичкина фиқҳий 'ЧП'ингизга (хусусий корхонангизга) қамаб олибсиз. Қачондан бери Яхшилик ва Адолат фақат сизнинг гуруҳингизнинг патентига ўтиб қолди? Сиз ўзингизни Жаннатнинг божхоначиси қилиб тайинлаб олгансиз, лекин Аллоҳ Қуръонда 'Ким зарра мисқолича яхшилик қилса, шуни кўради' (99:7) деган, у ерда 'фақат мана бу мазҳабда бўлса кўради' деган чеклов йўқ. Сиз эзгуликнинг олтин стандартини йўқ қилиб, одамларга ўзингиз босиб чиқарган қадрсиз 'шаклбозлик пулларини' сотяпсиз. Мен сизнинг коррупциялашган божхонангиздан ўтмайман, мен Тўғридан-тўғри Эгамнинг адолатига ишонаман!"
09.06.2026
https://t.me/iqro114
Sho.95
Комментариев нет:
Отправить комментарий