САМОВИЙ СУҒУРТА АГЕНТЛИГИ ва МАЪНАВИЙ ФЕОДАЛИЗМ

Осмонга кўчирилган "Ер юзи Бюрократияси"

Тарихда ҳар қандай подшоҳ ёки диктатор ўз саройига баланд деворлар қурган ва халқдан узилиб яшаган. Оддий деҳқон подшоҳга арзини айтмоқчи бўлса, тўғридан-тўғри кира олмаган. У аввал қоровулга, кейин вазирга, кейин бош вазирга пора бериши (хушомад қилиши) керак эди. Бу — Ер юзидаги чирик бюрократия.

Муллалар тизими нима қилди? Улар ўша чириган, порахўр сарой бюрократиясини олди-да, тўғридан-тўғри Осмонга — Аллоҳнинг устига проекция қилди (кўчирди)!

Улар халқнинг онгига шундай заҳарли ғояни сингдирди.."Аллоҳ жуда баландда, У подшоҳ, сен эса бир ифлос гуноҳкорсан. Сен Унга тўғридан-тўғри гапира олмайсан! Ўртада Унинг 'вазирлари' (авлиёлар, пирлар, шайхлар) бор. Сен ўшаларнинг этагини ушла, уларга назр-ниёз қил, улар сенинг аризангни 'тепага' олиб чиқиб, сенга Шафоат (ҳимоя) қилиб беришади".

Бу билан муллакратия Аллоҳни гўёки кимнингдир воситачилигига ва маслаҳатига муҳтож бўлган, адолатсиз бир "Золим Подшоҳ"га ўхшатиб қўйди. Бу Қуръондаги Аллоҳга қилинган энг катта туҳматдир!

Қиёматдаги "VIP-Суғурта Полиси" фирибгарлиги

Бугунги кунда одамлар машинаси ёки соғлиғини суғурта қилиш учун Агентликларга пул тўлайди. Агар ҳалокат рўй берса, Суғурта компанияси харажатни қоплайди.

Муллалар эса бутун бошли "Самовий Суғурта Агентлиги"ни очиб олган. Улар одамларга Қиёмат куни учун сохта "Суғурта Полисларини" сотишади

 "Мана бу тариқатга кирсанг, Қиёматда фалончи пир сенинг қўлингдан тутиб, Сирот кўпригидан ўтказиб қўяди".

 "Бизнинг мазҳабни маҳкам ушла, биз сенинг гуноҳларинг учун жавоб берамиз".

Лекин Қуръон бу сохта туризм ва суғурта агентликларининг эшигига катта қулф осади! Аллоҳ Зумар сураси 44-оятда кескин ва мутлақ ҳукмни эълон қилган

"Сен айт: “Шафоат тўлиғича Аллоҳга оид. Осмонлару-Ернинг мулки ҳам Унга тегишли. Сўнгра Унга қайтариласиз”

Қиёмат куни ҳеч қандай "Маънавий Суғурта" ишламайди. Ҳеч ким бировнинг юкини кўтармайди. Синдикат эса ўлик ва тирик шахсларни муқаддаслаштириб, улардан ёлғончи "Кафиллар" (Гарант) гуруҳини ясаб олган.

Маънавий Феодализм Қулнинг қули бўлиш

Ўрта асрларда Европада "Феодализм" тизими бўлган. Қирол ерни Катта Лордга беради, Лорд Баронга беради, Барон эса оддий деҳқонни қул қилиб ишлатади. Деҳқон ҳеч қачон эркин бўлмаган.

Муллакратия бугунги мусулмонларни худди шундай Маънавий Феодализмга маҳкум қилган.

Уларнинг мантиғига кўра, сиз тўғридан-тўғри Қуръонни ўқиб, Аллоҳга банда бўла олмайсиз. Сиз аввал қайсидир "имомнинг" муриди бўлишингиз керак, у имом бошқа бир "шайхнинг" вакили, у шайх эса минг йил олдинги "салафларнинг" давомчиси.

Сиз шунчаки Қулнинг қулининг қулисиз!

Қуръон эса инсонни бутун феодал занжирлардан озод қилиб, уни фақат ва фақат Битта Эгага — Аллоҳга тўғридан-тўғри боғлайди. Муллакратия эса инсоннинг мана шу Эркинлигидан ўлгудек қўрқади. Чунки эркин инсон уларнинг "Суғурта полисларини" сотиб олмай қўяди.

Агар қайсидир мутаассиб олдингизга келиб, "Сен уламоларни ёки пирларни ўртага қўймасанг, Қиёматда сени ҳеч ким шафоат қилмайди, ҳимоясиз қоласан" деб сизни ўзининг "сохта агентлигига" тортмоқчи бўлса...Унга шундай денг:

"Сиз Аллоҳни ўз саройидан чиқмайдиган, фақат таниш-билиш ва пора орқали иш қиладиган Ер юзидаги порахўр амалдорга ўхшатиб қўйибсиз. Сизнинг бу 'Шафоат' ва 'Воситачилик' ҳақидаги эртакларингиз — шунчаки Қиёмат куни учун очиб олинган сохта Суғурта компаниясидир. Аллоҳ Қуръонда 'Барча шафоат фақат Меникидир' деб, сизнинг бу коррупцион ва маънавий феодал тизимингизни аллақачон бекор қилиб ташлаган. Менга ўзининг жонини қутқара оладими ёки йўқми, билмайдиган одамларнинг 'VIP-чиптасини' сотманг. Менинг сафарим учун кафил ва ҳимоячи фақат Аллоҳнинг Ўзидир!"

08.06.2026
https://t.me/iqro114
Sho.95